ERC, bukas sa pagpalawig sang ‘no disconnection’ policy

Posible nga palawigon pa sang Energy Regulatory Commission (ERC) ang “no disconnection policy” nga nakatalana kuntani nga matapos sa Hulyo 31, 2026.

Suno kay ERC Chairman Nino Juan, pagadiskusyunan sang komisyon kun mahimo pa nga mapalawig ang temporaryo nga pagpauntat sang power disconnection bangud sa padayon nga reklamo sang mga konsumidor sa mataas nga balayran sa kuryente sa nagligad nga pila ka bulan.

Suno sa chairman, kun sarang pa, posible nga dugangan pa ini sang isa ka bulan agud mabuligan ang mga pumuluyo nga nabudlayan nga magbayad sang ila bill sa husto nga tion.

Dugang pa sang ERC, gin-aprubahan man sang komisyon ang mga request sang pila ka electric cooperative kag pribado nga power utility sa nagkalain-lain nga bahin sang pungsod nga utay-utayon lang ang pagpasaka sang sukot sa kuryente sa billing sang Hunyo kag Hulyo.

Nahibaluan nga ginapanawagan sang Power4People Coalition sa ERC nga mangin mas mabaskog sa paghatag sang proteksyon sa interes sang mga konsumidor.

Matandaan nga ginmandu sang ERC sang Mayo sa tanan nga distribution utilities sa pungsod nga i-suspinde anay ang service disconnections ukon pagpang-utod sang linya sang kuryente sa tanan nga indi makabayad kasunod sang nag-ibwal nga tension sa Middle East nga nagtuga sang krisis sa gatong diri sa pungsod kag nagresulta sa state of national energy emergency.