Ginkwestyon ni Senator-Judge Robin Padilla ang desisyon sang Senate Impeachment Court nga magpaguwa sang subpoena para sa tax kag bank records ni Vice President Sara Duterte.
Ini matapos ginbasa ni Presiding Judge Francis “Chiz” Escudero ang ruling nga nagasugot sa hingyo sang prosecution nga ipa-subpoena ang bank kag tax records sang vice president kag sang iya bana.
Ang ini nga mga dokumento pagagamiton sa pag-usisa sang akusasyon nga may yara sang wala maeksplikar nga manggad ukon unexplained wealth sa Article II sang impeachment complaint batok sa bise presidente.
Sa ikapito nga adlaw sang impeachment trial, ginpahayag ni Padilla nga pabor siya sa transparency kag Freedom of Information ukon FOI, apang kinahanglan nga pareho ang pagpatuman sang layi sa tanan nga impeachable officials.
Suno sa senador, ginagarantiya sang Konstitusyon ang equal protection of the law, gani dapat wala sang espesyal ukon lain nga pagtratar sa bisan sin-o nga opisyal sang gobyerno.
Gindugang pa niya nga ang pareho nga basehan nga ginagamit sa kaso ni Vice President Duterte dapat man nga maaplikar sa iban pa nga impeachable officials.
“Meron din po kasing napakahalaga yung tinatawag na equal protection of the laws,” suno kay Padilla nga nag-saad sang Article III, Section 1 sang Constitution sa idalom sang Bill of Rights.
“Ang mga pamantayang ginagamit natin ngayon ay dapat pareho rin ipinatutupad sa lahat ng impeachable officials, anuman ang kanilang pangalan o posisyon,” suno pa sa senator-judge.
Ginbalikan man ni Padilla ang pahayag sang anay Senador Miriam Defensor Santiago nga ang analysis sang Konstitusyon isa ka teknikal nga bahin sang layi kag kinahanglan nga sundon ang husto nga proseso ukon due process.
Ginpamangkot man sang senador kon pareho man bala ang ginhimo nga pagkuha sang bank kag tax records sa mga nagligad nga impeachment cases, lakip na ang ginmuno ni Senador Alan Peter Cayetano nga impeachment complaint batok kay Presidente Ferdinand Marcos Jr.
“Ang akin po lamang, makatarungan ba na hindi parehas ang trato natin dito? Dapat sana parehas eh,” suno pa sa iya.
Suno kay Padilla, kon amo ini ang standard sang transparency, mas maayo nga tanan nga mga opisyal sang gobyerno ang magbukas sang ila bank records agud mapakita sa publiko nga wala sang ginapaboran ang korte.
“Bakit kung ganito ang pamantayan natin, hindi buksan na natin lahat ng bank records natin. Lahat na. Tayong lahat ay buksan na natin lahat para mapakita sa taong-bayan na wala tayong kinikilingan dito,” dugang sini.
Gintapos sang senator-judge ang iya statement paagi sa pormal nga pagpabutang sa record sang iya pagkontra sa desisyon sang impeachment court.
