Ginpanginwala ni anay House Speaker Martin Romualdez ang alegasyon nga may plano siya nga magpalagyo sa pungsod agud malikawan ang posible nga kaso nga may kaangtanan sa kontrobersiya sa mga flood control projects.
Suno sa iya abogado nga si Atty. Ade Fajardo, wala sang basehan ang pahayag ni Assistant Ombudsman Mico Clavano nga nagapahayag nga luyag sang kongresista nga likawan ang imbestigasyon.
Pahayag ni Fajardo, nagapabilin sa Pilipinas si Romualdez halin sang nagguwa ang isyu kag nag-atubang pa gani ini sa Independent Commission for Infrastructure (ICI).
Ginpanginwala man sang isa pa niya ka abogado nga si Elaine Atienza ang alegasyon nga nagapanago ukon nagalikaw sa legal nga proseso ang anay Speaker.
Suno sa legal counsel, ang Office of the Ombudsman mismo ang nagkumpirmar nga wala pa sang napasaka nga kaso-kriminal batok kay Romualdez.
Dugang pa ni Fajardo, handa ang anay House Speaker nga mag-atubang sa bisan ano nga imbestigasyon kag wala ini sang rason nga maghalin sa pungsod.
Sa subong, ginatun-an sang legal team ni Romualdez ang posible nga himuon batok sa ila ginatawag nga wala sang basehan kag indi matuod nga pahayag ni Clavano.
Madumduman nga gin-aprubahan sang Sandiganbayan ang petisyon sang Ombudsman nga dagdagan si Romualdez sang precautionary hold departure order.
Sang nagligad nga adlaw, ginsiling ni Clavano nga bisan sini nga order, nakabaton ang Ombudsman sang “credible intelligence reports” nga wala naga-untat ang former Speaker sa tuyo nga magbiya sa pungsod.
Matandaan man nga sang Byernes, ginpahayag man ni Ombudsman Jesus Crispin “Boying” Remulla nga malapit na lang ipasaka ang kaso nga plunder batok kay Romualdez. Nagpaathag ini nga indi mahimo nga dali-dalion ang kaso bangud ginasigurado nila nga mabakod ang akusasyon nga indi basta-basta lang nga mawasak sang defense team sang former house speaker.
Yara na subong ang plunder and money laundering complaint sa preliminary investigation stage nga isa ka tikang na lang halin sa pagtumod kun ipasaka na bala ang kaso sa Sandiganbayan.
