Napabilin sang Tropical Depression Kiyapo ang kabaskugon sini samtang nagahulag malapit sa Extreme Northern Luzon.
Sa alas dos sa kaagahon nga update sang weather bureau, ulihi nga nakit-an ang sentro sang bagyo sa kalayuon nga 410 km nasidlangan sang Aparri, Cagayan.
Dala sang bagyo ang kabaskugon sang hangin nga 55 km/h malapit sa sentro kag pagmadlos nga tubtub sa 70 km/h.
Nagahulag ini sa direksyon nga pa-nakatundan naaminhan nakatundan sa kadasigon nga 30 km/h.
Napasaka sa Wind Signal No. 1 ang masunod nga lugar kun sa diin may warning lead time nga 36 oras kag may paandam sang makusog nga hangin:
- Batanes, Cagayan lakip na ang Babuyan Islands, Isabela, Nueva Vizcaya, Quirino, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, kag ang northern kag central portions sang Aurora (Dilasag, Casiguran, Dinalungan, Dipaculao)
Suno sa PAGASA, posible nga Wind Signal No. 2 ang pinakamataas nga signal nga ipa-gwa samtang nagalaslas ang bagyo, apang posible man ang Signal No. 3 kun magbaskog pa ini sa severe tropical storm samtang yara sa area sang Batanes-Babuyan Islands.
Magadala naman ang Southwest Monsoon ukon ang Habagat kag ang punta sang Bagyo Kiyapo sang mamadlos nga hangin sa kadam-an nga parte sang pungsod ilabi na sa coastal areas ukon malapit sa mga baybayon subong nga adlaw.
Sa bwas naman, makaapekto ini sa kadam-an nga parte sang Luzon, Visayas, Zamboanga del Norte, Davao Oriental, kag Dinagat Islands.
Base sa PAGASA, sa forecast track, magalabay ang sentro sang bagyo sa northeastern portion sang mainland Cagayan sa tunga-tunga sang subong nga aga kag karon sa hapon, antes ini maglabay sang tuman ka lapit ukon maga-landfall sa vicinity sang Babuyan Islands sa tunga-tunga sang karon sa hapon kag karon sa gab-i.
Ginapaabot nga magabaskog pa ang bagyo samtang nagahulag sa Philippine Sea kag posible nga mangin tropical storm subong nga aga.
Suno sa PAGASA, padayon pa gid ini nga magabaskog samtang nagatabok sa Extreme Northern Luzon, kag posible nga mangin severe tropical storm pagkatapos makalabay sa Babuyan Islands.
Sa tion nga yara na ini sa West Philippine Sea, posible nga madasig pa gid ang pagbaskog sini kag mangin isa ka typhoon antes mag-landfall sa nakatundan nga bahin sang mainland China.
Gina-forecast nga magaguwa ang bagyo sa Philippine Area of Responsibility (PAR) sa bwas sa aga.
