Ginpromisa ni United States President Donald Trump nga ipalab-ot sini kay Chinese President Xi Jinping ang mga ginakabalak-an sang Pilipinas kaangot sa sitwasyon sa West Philippine Sea.
Ini ang kabahin sang ila naistoryahan ni President Ferdinand “Bongbong” Marcos, Jr. paagi sa telepono.
Pareho nga ginkumpirmar sang Presidential Communications Office (PCO) kag ni US Ambassador to the Philippines Lee Lipton ang amo nga hinun-anon sa tunga sang duha ka presidente.
Suno sa PCO, nalakip sa gin-istoryahan nanday Marcos kag Trump ang mga naga-eksister subong nga sitwasyon sa kalibutan, sa ekonomiya, kag sa seguridad. Ginpahayag sang talatapan nga ginpasiguro ni Trump nga ihambal sini kay Xi ang mga isyu sang Pilipinas sa ila masunod nga pagtililipon.
“President Ferdinand R. Marcos Jr. just had a phone conversation with US President Donald Trump and they discussed the current global, economic and security situation,” suno kay PCO Acting Secretary Dave Gomez.
“President Trump assured President Marcos that he will take up the concerns of the Philippines in his next meeting with Chinese President Xi Jinping,” dugang sini.
Antes sini, ginpalab-ot man ni Marcos kay US Secretary of State Marco Rubio ang mga pinakaulihi nga insidente sa West Philippine Sea sa ila meeting sa Malacañang sini lang nga semana.
Una naman nga ginpahayag sang Malacañang nga luyag sang presidente ang isa ka “reset” ukon panibag-o nga panugod sa relasyon sang Pilipinas kag China agud malikawan ang pagliwat sang tensyon sa Ayungin Shoal.
Sang Hulyo 20, matandaan nga napilasan ang duha ka miyembro sang Philippine Navy matapos ginkompronta sang China Coast Guard samtang yara malapit sa barko sang Pilipinas nga BRP Sierra Madre nga yara naka-estasyon sa Ayungin Shoal nga nahamtang sa sulod sang exclusive economic zone (EEZ) sang pungsod.#
