Liwat nga ginlaslasan ni Davao City Mayor Baste Duterte ang administrasyon ni President Ferdinand Marcos Jr.
Kadungan ini sang ginhiwat nga national assembly sang Partido Demokratiko Pilipino (PDP) kahapon nga adlaw, Hulyo 25, sa Matina, Davao City.
Suno kay Duterte, luyag nga unahun sang Malacañang ang impeachment trial batok kay Vice President Sara Duterte agud punggan ini nga makapadalagan sa mas mataas nga posisyon sa 2028 elections.
Ginsiling man niya nga kinahanglan nga padayun nga manindugan ang bug-os nga pungsod para sa bwas-damlag sang masunod nga mga henerasyon sa tunga sang mga pagpanghangkat nga ginaatubang sang pungsod.
Pahayag sang alkalde, bisan pa nga dalagkuan nga mga opisyal ang ila paga-atubangon kag padayun ang mga ini nga magapamahog sa publiko, dapat gid nga ipakita ang ila nga panindugan para sa kamatuoran.
Dugang pa niya, magapadayun ang ila protesta sa gobyerno samtang wala pa sila naubos preso.
Nahibaluan nga kabahin man sa mga nagtambong sa nasambit nga aktibidad amo sanday Senator Robin Padilla, Senator Bong Go, Atty. Wendel Avisado, Former Cebu City Mayor Mike Rama, Atty Ferdinand Topacio, Atty Jimmy Bondoc, kag actor nga si Philip Salvador.
