Nagtingob-pwersa ang Task Force Morals and Values Formation (TFMVF) sang Iloilo City Government kag ang kapulisan agud nga ma-check ang Esplanade 11 sa Barangay Progreso, Lapuz, Iloilo.
Diri nga lugar nakuhaan sang video ang isa ka menor de edad nga babaye kag ang isa ka lalaki nga nagapakighilawas.
Sa interview sang Bombo Radyo kay Mr. Nestor Canong, head sang TFMVF, iya ginpahayag nga nagpatigayon sila sang saturation drive kag foot patrol agud nga mapasiguro ang kalinong kag katawhay sang lugar.
Kaupod nila ang mga personnel sang Iloilo City Police Station 8.
Ginhingyo man niya ang mga pumuluyo nga buligan sila agud mauntat na ang isyu nga ini, untatan na ang pag-post, share kag pagpalapta sang amo nga video.
Magluwas sa closed circuit television nga ipatakod ni Mayor Raisa Trenas sa lugar, na-istoryahan man suno sa natungdan nga posible ipasirado ang lugar kun indi pa mag-untat ang pagbisita nga may indi mayo nga intension.
Lakip man sa ginmandu sang alcalde amo nga pasangkaron kag hugton ang pagbantay sa mga esplanade kag plaza lakip na ang Sunset Boulevard.
Una naman nga nagpanawagan ang Iloilo City Police Office (ICPO) nga untatan na ang pag-share, pag-repost, kag pagpalapta pa sang amo nga video bangud sa mahimo matuga sini nga damage sa privacy kag dignidad sang mga persona nga involved.# —with reports from Bombo Ireca Pioquinto
