Nagdala sang bugal sa probinsya sang Iloilo ang apat ka mga lamharon nga atleta nga nagkampyon sa 19th World Taekwondo Culture Expo sa South Korea.
Tatlo sa ila ang halin sa Passi City nga amo sanday:
- Leigh Yvaine Cia nga nagpangibabaw sa U18 Women’s Poomsae kag U18 Women’s Kyorugi
- Cattaleya Julia Orozco nga nagdaog man sang gold medals sa U12 Women’s Poomsae kag U12 Women’s kyorugi
- Bella Suzanne Orozco nga nagbulsa man sang bulawan nga medalya sa U10 Women’s Poomsae kag U10 Women’s Kyorugi
Ang nagpauli naman sang bulawan nga medalya halin sa Barotac Viejo amo si Abby Gaylo Lacanieta nga nagkampyon sa U15 Women’s Poomsae kag Women’s Kyorugi.
Sa interview sang Bombo Radyo kay Coach Mark Pinggol halin sa Orozco Training Center MVP Taekwondo Gym, iya ginpahayag nga naangin palaagyan ang Expo agud nga ma-eksperyensyahan man kag matun-an sang delegates ang kultura sang iban nga nasyon.
Nagpasalamat man si Pinggol sa suporta sang mga ginikanan sang Ilonggo athletes nga nagbunga gid bangud sa ila kadalag-an.
Tuman naman ang pagpasalamat sang Ilonggo athletes sa ila pamilya kag sa ila local government units sa suporta nga nahatag sa ila.
Nahibaluan nga ginpatigayon ang amo nga event sang Hulyo 16-21, 2026 sa Taekwondowon Center sa Muju.
Ang World Taekwondo Culture Expo ginakabig nga pinakauna nga premier international taekwondo festival sa South Korea nga nagatipon sang kapin sa 4,000 ka mga atleta, coach, kag enthusiasts halin sa nagkalain-lain nga mga pungsod.
Sa ika-19 sini nga edisyon, ang aktibidad nangin isa na sa pinakadaku kag pinakaprestihiyoso nga pagtilipon sang mga naga-practice sang taekwondo sa kalibutan. Nagahatag ini sang kahigayunan sa mga atleta nga mag-compete, magbinuligay, kag magpakigbahin sang ila ihibalo kag eksperyensya, kag ma-eksperyensyahan ang South Korea bilang ginhalinan sang sini nga martial art.#
