Ginduso ang hagna agud nga i-postpone ang Barangay and Sangguniang Kabataan Elections (BSKE) sa Nobyembre 2, 2026 kag isaylo sa Nobyembre 2028.
Ini nga House Bill 10591 ang gin-file ni Negros Occidental Third District Rep. Javier “Javi” Miguel Benitez kahapon, Agusto 4, matapos nakakuha sang suporta halin sa 63 ka mga kongresista.
Suno kay Benitez, tatlo ang nagapanguna nga rason sang iya nga panawagan kun sa diin nalakip ang nagapadayon nga krisis sa enerhiya, ang epekto sang mga nagligad nga kalamidad, kag ang preparasyon para sa una nga regular nga parliamentary elections sa Bangsamoro Autonomous Region in Muslim Mindanao ukon BARMM.
Ginpahayag sang kongresista nga ang padayon nga tensyon sa Middle East nagresulta sa pagsaka sa presyo sang petrolyo sa kalibutan nga nakaapekto sa gasto para sa transportasyon, kuryente, logistics, kag iban pa nga kinahanglanon sa pagpatigayon sang eleksyon.
Dugang pa niya, naghatag man sang daku nga halit ang mga linog sa mga eskwelahan kag pampubliko nga imprastraktura sa nagkalainlain nga lugar.
Suno sa kongresista, bangud ginagamit ang mga pampubliko nga eskwelahan bilang polling centers, mahimo ini makaapekto sa safety sa eleksyon.
Suno pa kay Benitez, ang postpone sang BSKE magahatag man sang mas daku nga tiyempo sa Commission on Elections kag iban nga ahensya sang gobyerno sa pagpreparar para sa una nga regular nga BARMM parliamentary elections nga natalana sa Setyembre 14.
Nahibaluan nga padayon sa subong ang preparasyon para sa BSKE samtang wala pa naaprubahan sang Kongreso kag napirmahan bilang layi ang amo nga hagna.
