Gindala na sa kustodiya sang Bureau of Jail Management and Penology (BJMP) sa New Quezon City Jail si anay House Speaker kag Leyte Representative Ferdinand Martin Romualdez.
Nag-abot si Romualdez sa jail facility 10:49 kagab-i matapos nga gin-discharge halin sa Philippine General Hospital ukon PGH kun sa diin siya na-confine sang weekend para sa independent medical examination.
Ginkumpirmar sang BJMP spokesperson nga si Captain Jayrex Bustinera ang pag-abot ni Romualdez.
Ginsunod sini ang standard booking procedures, lakip na ang medical evaluation, fingerprinting, mugshot, interview kag jail orientation.
Matandaan nga kahapon, ginmando sang Sandiganbayan Third Division ang pag-saylo kay Romualdez halin sa PGH pakadto sa presuhan matapos nagtestigo ang PGH Director nga si Dr. Gerardo Legaspi nga estable na ang kondisyon sang kongresista kag mahimo na siya ma-discharge.
Suno kay Legaspi, base sa pag-usisa sang mga espesyalista sa PGH, manubo ang risgo ni Romualdez nga ma-atake ang iya korason samtang kontrolado man ang iya hypertension kag diabetes.
Ginkumpirmar man ni Legaspi nga nagasuprer matuod si Romualdez sang anxiety kag depression apang wala ini nagakinahanglan sang padayon nga confinement sa ospital.
Antes sang independent medical examination, ginpanindugan sang kampo ni Romualdez nga dapat magpabilin ini sa ospital bangud sa sampaw-sampaw nga mga balatian.
Matandaan nga Septyembre 7 sang ginpaguwa sang korte ang arrest warrant kay Romualdez sa kaso nga plunder nga nagalakip sang ginapatihan nga P7.44-billion nga kickbacks halin sa mga contractor kag iban pa nga indibidwal kag entity nga may interes sa flood control, infrastructure kag iban pa nga proyekto sang gobyerno halin 2022 tubtob 2025.
Ginapanginwala ni Romualdez ang mga alegasyon kag ginpahayag nga inosente siya kag handa nga atubangon ang mga kaso batok sa iya sa nagakaigo nga korte.
