Apisar bag-o pa lang nagsugod ang Asian Games 2026, nagpauli sa Pilipinas ang presidente sang Gymnastics Association of the Philippines (GAP) nga si Cynthia Carrion matapos mapatay ang iya bana.
Emosyonal nga ginpahibalo ni Carrion ang balita sa Philippine Olympic Committee Media antes magsugod ang qualifications sang men’s artistic gymnastics team sa Nagoya City General Gymnasium Rainbow Hall sa Japan.
Suno kay Carrion, dapat magpabilin siya upod sa mga atleta sang Pilipinas sa bug-os nga tournament, apang kinahanglan niya magpauli matapos nabaton ang impormasyon nga nagtaliwan ang iya bana bangud sa cancer.
“My fellow colleagues in sports, if you don’t see me, I’m out. I’m going home today,” suno kay Carrion samtang halos nagatalangison sa atubang sang reporters. “I am supposed to be here all the time for my athletes, but I cannot because my husband just died today with cancer, so I’m flying back tonight.”
Yara sa Nagoya si Carrion agud suportahan ang men’s kag women’s artistic gymnastics teams.
Bisan maga-uli siya sang mas temprano, ginpahayag ni Carrion nga yara gihapon ang iya tagipusuon sa iya mga atleta kag ginpangamuyuan niya ang ila madinalag-on nga kompetisyon para nga makabulsa sang medalya.
“My heart is with all my athletes and I wish them all luck to win a medal for me. Thank you so much,” suno sa GAP President.
Lakip sa nagahampang para sa Pilipinas amo sanday Olympic gold medalist Carlos Yulo, Karl Eldrew Yulo, Miguel Besana, Justine Ace De Leon kag Zachary Nunez.#
