Ginpahayag sang isa ka legal expert nga ang pagkalakip nga myembro ni Vice President Sara Duterte sa board of directors sang isa ka korporasyon ang mahimo kabigon nga aktibo nga pagpakigbahin sa negosyo.
Ini kasunod sang pagtestigo ni Securities and Exchange Commission (SEC) Company Registration and Monitoring Department Director Gerardo Del Rosario sa impeachment trial ni Duterte, kun sa diin ginpresentar nga ang bise presidente ang nagpabilin nga shareholder kag miyembro sang board of directors sang Metro City Chow Foods Corporation halin 2022 tubtob 2025, bisan yara na ini sa pwesto bilang Vice President.
Sa interview sang Bombo Radyo kay Atty. Noel Palomado, former legal officer sang Commission on Audit kag auditor sang United Nations, iya ginpahayag nga may aktibo nga papel ang board of directors sa paghimo sang mga polisiya kag sa paggiya sa operasyon kag pagdumala sang isa ka kompanya.
Bangud sini, indi lamang ini simple nga pagpanag-iya sang shares, bangud bilang isa ka board member nagalakip man sang pagpakigbahin sa mga desisyon kag pagdumala sang korporasyon.
Pahayag pa sang abogado, ginadumilian sang 1987 Constitution ang Presidente, Vice President kag mga miyembro sang Gabinete nga magpraktis sang ila propesyon, magpakigbahin sa negosyo ukon mag-angkon sang financial interest sa pila ka kontrata kag pribilehiyo samtang yara sa pwesto.
Ginpunto man ni Atty. Palomado, nangin pamangkot man kun paano nga wala naatubang ukon wala nahibaluan ang amo nga constitutional restriction, bangud si Duterte isa ka abogado kag amo man ang iya bana nga si Atty. Manases Carpio.
Ginpahayag pa niya, importante ini nga konsiderasyon bangud ang amo nga constitutional provision may kaangtanan mismo sa pagpakigbahin sa negosyo samtang yara sa pwesto.
Dugang pa ni Atty. Palomado, bangud sini, nangin importante nga isyu sa impeachment trial ang pagkapabilin ni Duterte bilang board member kag ang iban pa niya nga business interests samtang naga-serbisyo bilang Vice President.
