Gin-athag sang House Prosecution Panel nga wala nakadepende sa viewership ang pagpadayon sa impeachment trial ni Vice President Sara Duterte.
Ini kaangot sa pila mga reports nga gamay lang nga mga Pilipino ang interesado sa pagsunod sa proceedings sa Senate Impeachment Court.
Sa Social Weather Stations (SWS) survey nga ginpatigayon halin sang Septyembre 21 tubtub 27, nakasaad nga 15% sang mga Pinoy ang nagasunod ukon nagasubaybay gid sa trial.
Sa amo nga survey, 27% ang wala gid nagasunod, samtang 9% sa respondents ang nagsiling nga mabatian lang nila ang impeachment trial sa mga interview.
Sa interview sang Bombo Radyo kay Rep. Zia Alonto Adiong, spokesperson sang House Prosecution Panel, iya ginpahayag nga ginapaabot na nila ang amo nga reaksyon sang publiko apang wala ini nakahulugan nga untaton na ang proceedings.
Pahayag sini, nakadikta sa Konstitusyon nga dapat magpaidalom sa trial ang opisyal kun mabakod ang ebidensya nga may yara sang culpable violation sang Konstitusyon kag pagtraidor sa pagsalig sang mga pumuluyo.
“Pananagutan po ito sa Saligang Batas. Wala naman pong sinabi doon sa Saligang Batas na ‘kung bumaba ang viewership, itigil niyo ang kaso na yan.’ Di ba? Continuous pa rin po tayo, kasi pananagutan ito na dapat i-explain ng Bise Presidente,” suno kay Adiong.
Ginhalimbawa sini ang mga nakabutang sa Statement of Assets, Liabilities, and Net Worth (SALN) ni Duterte nga wala nagasanto sa iya record sa Bureau of Internal Revenue (BIR); ang P817.87 million nga undeclared kag unexplained wealth nila sang iya bana halin sang 2022 tubtub 2025; kag ang business interests sini apisar nga nagapungko siya bilang ikaduha sa pinakamataas nga opisyal sang pungsod.
“Hindi ito naka-anchor kung mataas ba ang viewership. The fact of the matter is that, meron pong violation, culpable violation of the Constitution, meron po siyang pananagutan na dapat niyang harapin, at meron po siyang pagtataksil sa tiwala ng taumbayan noong hindi po niya ma-explain at itinago po niya yung ibang parte sa kaniyang ari-arian,” dugang sang kongresista.
Nahibaluan nga ginpatigayon ang survey sang SWS antes gin-drop ukon gin-atras sang House prosecution panel ang tatlo sa apat ka impeachment articles.
Ang nabilin na lamang subong amo ang Article II ukon ang akusasyon sa unexplained wealth.
Naggamit ang SWS sang face-to-face interviews sa 1,500 adults kun sa diin 600 sa Balance Luzon, kag tag-300 sa Metro Manila, Visayas, kag Mindanao.#
