Magadeploy sang portalets, street sweepers kag additional garbage trucks ang General Services Office (GSO) sang Iloilo City Government bilang kabahin sang preparasyon para sa pista minatay.
Sa interview sang Bombo Radyo kay Engineer Niel Ravena, head sang City GSO, iya ginpahayag nga ginahanda na sang ila opisina ang pagbutang sang portalets sa mga dalagko nga sementeryo, lakip ang Catholic Cemetery sa Jaro kag Tanza Cemetery, City Proper.
Suno sa iya, maga-deploy man sang street sweepers sa mga kalsada kag palibot sang mga patyo sa syudad, kag magabutang man sang waste bins sa mga city-owned cemetery agud mapadali ang pagkolekta sang mga basura.
Gina-apelar man ni Engr. Ravena ang publiko nga mag-dispose sang ila basura sa mga gin-designate nga collection points agud mangin hapsay ang pagdumala sang solid waste.
Pahayag pa niya, maga-deploy man ang ila opisina sang additional garbage trucks para sa madasig kag organisado nga pagkolekta sang basura sa mga patyo kadungan sang pag-oberbar sang pista minatay.
Ginpakigbahin man ni Ravena nga isa sa mga ginatutukan sang ila nga opisina ang paggamit sang floral foam sa mga flower arrangement bangud madugay ini nga madunot kag mahimo mangin microplastics.
Bangud sini, i-dokumento sang GSO ang kadamuon sang floral foam nga magamit sa pista minatay agud matun-an kon mahimo ini nga basehan sa paghimo sang ordinansa nga magadumili ukon magarehistro sang mas istrikto nga regulasyon sa paggamit sini sa masunod nga tuig.
Dugang pa, nagapanugyan ang city government sa publiko nga magsunod sa mga protocols nga ginapatuman agud magpabilin nga hilway, organisado kag malimpyo ang palibot kadungan sa pagsaulog sang pista minatay subong nga tuig.
