Magapatuman sang dugang kag mas hugot nga requirements ang Iloilo City Police Office (ICPO) para sa mga maga-internship sa police stations.
Ini matapos ang report nga may yara sang isa ka criminology student nga nag-intern sa isa ka police station sa syudad ang ginatudlo nga source sang iligal nga droga sang isa ka Sanggunian sang kabataan kagawad nga nadakpan sa ginpatigayon nga drug buy-bust operation sang Jaro Police Station.
Sa interview sang Bombo Radyo kay ICPO Director Police Colonel Wilbert Parilla, iya ginpahayag nga natumod na nila ang estudyante, apang indi nila mahimo nga ihayag sa publiko ang pagkakilalan sini kag ang iya nga eskwelahan.
Suno kay PCol. Parilla, ginapamatud-an pa kon nag-intern gid man ang nasambit nga estudyante sa opisina sang ICPO.
Pahayag pa niya, nagpakig-angut naman ang ICPO sa tanan nga eskwelahan sa syudad nga nagapadala sang ila mga estudyante para sa internship sa mga police stations lakip na ang iban pa nga mga kurso magluwas sa criminology agud nga masekyar ang mga ini.
Ginpahayag pa ni Parilla, kabahin sa ila tikang ang pag-rebyu sang mga requirements sang mga aplikante para sa internship agud masiguro nga ang mga estudyante nga ginapadala sang mga eskwelahan ang nagakaangay nga mag-agi sa training sa kapulisan.
Ginalantaw man sang ICPO ang posibilidad nga dugangan ang mga requirements para sa mga gusto mag-intern sa mga police stations agud masiguro nga ang mga estudyante ang wala naga-engage sa iligal nga mga aktibidad.
Ini bangud, suno sa director, indi gid manami nga naga-engage sa iligal nga buluhaton ang isa ka estudyante nga nagahandum mangin isa ka pulis.
