Ginkumpirma ni Mayor Raisa Treñas kadungan man sang iya ikaduha nga State of the City Address subong nga adlaw nga mangin bastante na ang tubig sa katapusan sang tuig 2027 sa syudad sang Iloilo.
Suno kay Mayor Raisa Treñas nagapadayon ang pag-ilis sang mga daan nga pipes sang Metro Pacific Iloilo Water kag maga-develop man sang dugang nga sources sang tubig.
Pahayag pa sini nga gina-monitor man sang city government ang mga proyekto sang water company agud masiguro nga may yara sang supply sang tubig para sa mga residente, ilabi na sa tion sang El Niño phenomenon.
Isa sa mga major projects sang MPIW amo ang desalination project, sa diin ginalauman nga makahatag ini sang dugang nga 65 million liter sang tubig kada adlaw.
Pahayag sang alkalde, ang non-revenue water sang MPIW yara malapit sa 50 percent.
Apang nagpasalig man ang MPIW suno kay Mayor Treñas nga mabuhinan ang non-revenue water level sa katapusan sang subong nga tuig.
Ginpahayag man sang alkalde nga regular ini nagapakigsapol sa MPIW agud i-review ang proyekto kag ma-address ang mga problema nga nagaapekto sa water services.
Samtang, ginpabutyag man ni Mayor Treñas nga magahingyo siya sa kompaniya nga magpangita sang dugang ukon backup sources sang tubig agud masiguro nga estable ang supply sa tion sang El Niño.
By: Bombo Lynd-C Bade
