Ginkumpirma sang Philippine Atmospheric, Geophysical and Astronomical Services Administration (PAGASA) nga opisyal na nga nagsugod ang Amihan ukon Northeast Monsoon season.
Suno kay PAGASA Administrator Nathaniel Servando, padayon nga ginabantayan sang ahensya ang sitwasyon bangud dungan ang Amihan sa gina-eksperyensya subong nga El Niño phenomenon.
Pahayag pa sang weather bureau, sa masunod nga mga bulan, ginapaabot nga magadominar ang Amihan sa kalabanan nga bahin sang pungsod.
Ini ang magadala sang mas matugnaw nga hangin kag mas mabaskog nga balod sa kadagatan.
“In the coming months, the Amihan is expected to become dominant over most parts of the country, bringing cooler weather, episodes of cold surges, and rough sea conditions,” pahayag sang bureau.
Suno pa sa PAGASA, posible man nga makaapekto sa kahimtangan sang panahon ang shear line, tropical cyclones, kag Intertropical Convergence Zone ukon ITCZ.
Ginpaathag ni Servando nga bisan pa nga nagadala sang ulan ang Amihan, mas manubo ang ginapaabot nga pag-ulan bangud sa El Niño.
Suno sa iya, posible nga magapabilin nga manubo ang kadamuon sang ulan sa masunod nga mga adlaw kag semana samtang nagapadayon ang Amihan season.
Dugang pa niya, bisan pa sa nagaluntad nga El Niño, ginapaabot gihapon ang matugnaw nga hangin halin Nobyembre tubtob Enero, apang posible nga mas mainit sang naandan ang temperatura sa sini nga mga bulan.
“Although we expect na relatively, compared to the temperature for the season — November, December, January — warmer than the normal,” suno kay Servando, “May mga araw din na malamig but hindi ganoon ka sustained.”
Nauna na nga ginpahayag sang PAGASA nga ang average temperature sa Pilipinas ang magasaka sang 1 tubtub 2 degrees Celsius kadungan sang El Niño phenomenon.#
