Ginpaathag sang Malacañang nga tuman pa ka temprano agud istoryahan kun sin-o ang mangin masunod nga bise presidente sang Pilipinas pananglitan nga ma-convict si Vice President Sara Duterte sa impeachment trial.
Ini ang kasunod sang panawagan ni Senate Minority Leader Alan Peter Cayetano sa iya mga kaupdanan nga senador nga indi magbaton sang bisan ano nga tanyag halin sa Malacañang nga magbulos sa ikaduha nga pinakamataas nga posisyon sa pungsod kun ma-convict si Duterte.
Suno kay Palace Press Officer Claire Castro, indi pa dapat pag-istoryahan ang pag-ilis sa bise presidente bilang pagrespeto sa Office of the Vice President (OVP).
“Unang-una po ay hindi po dapat pinag-uusapan ang pagpalit kay Bise Presidente sa panahon na ito, napaka-premature. Para sa akin, igalang natin ang opisina ng Bise Presidente,” suno sa Palace official.
“Kung mayroon mang hindi gumagalang sa Pangulo, kung mayroon mang nagpapahayag ng mga negatibo sa Pangulo – kahit hindi na siya ang irespeto, irespeto na lang natin ang opisina ng Bise Presidente,” pahayag pa sini.
Dugang pa ni Castro, wala man sang kinamatarong si Cayetano nga magdikta sa iya mga kaupdanan nga senador kun ano ang dapat nila himuon, ukon pangunahan ang desisyon ni Presidente Ferdinand Marcos Jr.
“Una, very premature; dahil sabi niya dahil premature walang paggalang sa opisina ng Bise Presidente; pangalawa, wala naman siyang karapatang magdikta sa lahat ng senador kung anong gusto ng senador; pangatlo, at wala rin po siyang karapatan pangunahan ang nais ng Pangulo,” pahayag ni Castro.
Sa iya Facebook post sang Lunes, ginpahayag ni Cayetano ang iya pagsuporta sa panindugan ni Senate President Pro Tempore Francis “Chiz” Escudero nga indi niya pagbatunon ang bisan ano nga tanyag nga mangin bise presidente pananglitan magresulta sa conviction ang impeachment proceedings.
Suno kay Cayetano, kinahanglan nga magpabilin nga neutral sa pulitika ang mga senador nga nagaserbe bilang mga hukom sa impeachment trial kag wala sang iban nga motibo sa pag-convict magluwas sa ebidensya nga nagapamatuod sang mga alegasyon sa impeachment.
Samtang, suno naman kay Senator Panfilo Lacson, indi pa nagakaangay nga unahan ang desisyon ni Marcos kag limitahan ang iya mga pagpili para sa posible nga mangin bulos kay Duterte.
Ginpaathag ni Lacson nga padayon pa ang impeachment trial kag wala pa sang kasiguruhan kun ano ang mangin desisyon, gani premature pa nga istoryahan kon sin-o ang mangin masunod nga bise presidente.#
