Nagpositibo sa ginpatigayon nga random drug testing ang duha ka tricycle drivers sa idalom sang OPLAN HARABAS sang Philippine Drug Enforcement Agency Region VI ukon PDEA VI.
Sa interview sang Bombo Radyo kay Ma. Graziella “Shey” Tanaleon, spokesperson sang PDEA VI, iya ginpahayag nga sa 401 ka drivers/dispatchers nga ginpaidalom sa drug testing duwa ang nagpositibo nga nagikan sa MacArthurs Wharf Ferry Terminal sa Guimaras kag sa Pavia Public Market Terminal.
Sa subong, ginahulat pa ang resulta sang confirmatory testing sang duha ka drivers agud mahibaluan ang nagakaigo nga mga intervention nga kinahanglan ipatuman sa ila.
Nagapasalamat man ang ahensya bangud madamo sang nagakooperar kag nagasuporta nga mga drivers sa ila ginapatigayon nga operasyon nga para man sa kaluwasan sang publiko.
Nagapanawagan man sila nga maaprubahan sa sulod sang anum ka bulan ang pagbutang sang stickers nga nagapakita nga “Drug-Free Driver” ang mga drivers nga nakapasar sa drug testing, agud makilala ang mga salakyan nga ginamaneho sang drug-free drivers.
Nahibaluan nga kaupod sang PDEA VI sa operasyon ang iban pa nga ahensya sang gobyerno, lakip ang Land Transportation Office Region VI (LTO-6) paagi sa ila nga programa nga “Oplan Byaheng Ayos,” Philippine National Police kag iban pa.
