Nagpanawagan si Iloilo Governor Arthur Defensor Jr. sa publiko nga maghalong kag sundon ang mga pagsulundan sa pagbisita sa mga patyo sa tion sang Pista Minatay 2026.
Ginapanugyanan sang gobernador ang tanan nga mangin responsable kag magrespeto sa iban nga mga bisita, ilabi na nga madamo ang ginalauman nga magkadto sa mga patyo sa pagdumdum sa ila mga napatay nga mga himata.
Ginpahanumdom man niya ang publiko nga likawan ang mga aktibidad nga mahimo makadisturbo sa iban nga nagabisita sa patyo.
Lakip diri ang pagkonsumo sang alcoholic drinks, pagdala sang speakers ukon sound system, pagpabaskog sang music, pagsinggit kag paghimo sang sobra nga gahod.
Ginapanugyan man sini ang publiko nga indi magdala sang armas, matalom nga mga butang, kag iban pa nga delikado nga gamit.
Dapat likawan man ang paghaboy sang basura bisan diin lang bangud may mga basurahan man nga yara sa mga patyo kag indi gid pag bilin-bilin ang mga gamit.
Suno kay Defensor, kinahanglan nga mangin preparado ang tanan antes magkadto sa patyo bangud madamo nga problema ang mahimo matabo kon madamo ang tawo sa isa ka lugar.
Gina-engganyo sang gobernador ang publiko nga magbinuligay kag magkooperar sa mga otoridad kag personnel sang patyo agud masiguro nga malinong, matawhay kag safe ang pag-obserba sang Pista Minatay 2026.
Dugang pa niya, ang pagkadto sa patyo dapat mangin tion sang pagdumdum kag paghatag respeto sa mga pinalangga nga napatay, kag indi oportunidad para sa mga aktibidad nga makadisturbo sa iban nga bisita.
By: Bombo Lynd-C Bade
