Gin-deploy na umpisa subong nga adlaw, Oktubre 31, ang 6,552 ka mga personnel sang law enforcement agencies kag force multipliers sa bug-os nga Western Visayas agud masiguro ang seguridad sang publiko sa pagsaulog sang Pista Minatay.
Suno sa Police Regional Office 6 (PRO-6), magapadayon ang deployment sang mga personnel tubtob sa Lunes, Nobyembre 2, agud magbantay sa mga bisita sa patyo amo man sa mga biyahero kag mga motorista.
Magabulig man sa operasyon ang mga personnel sang Bureau of Fire Protection (BFP), Armed Forces of the Philippines (AFP), Philippine Coast Guard (PCG) kag Civil Aviation Authority of the Philippines (CAAP).
Magluwas sa ila, magahatag man sang assistance sa pagmintinar sang kalinong kag katawhay ang mga Barangay Peacekeeping Action Teams, mga empleyado sang lokal nga panguluhan, kag traffic enforcers.
Suno sa PRO-6, ipaidalom sa full alert status ang tanan nga police units agud masiguro ang kaluwasan sang publiko kag makahatag sang gilayon nga bulig sa tion sang emerhensya.
Mismo si PRO VI Director Randulph Tuaño ang naglibot man sa mga patyo sa probinsya subong nga adlaw agud nga magpatigayon sang security inspection. Lakip sa iya nakadtuan amo ang Guimbal, Miagao, San Joaquin, Iloilo City; kag mangin sa Anini-y, Antique.
Samtang, ginpangabay naman ni Police Major Shella Mae Sangrines, spokesperson sang Iloilo City Police Office (ICPO), ang publiko nga magsunod sa mga patakaran nga ginapatuman sa mga patyo.
Lakip diri ang paglikaw sa pag-inom sang makahulubog nga ilimnon, sugal kag paggamit sang sobra kagahod nga sound system, pati na ang pagdala sang wala ginatugutan nga mga armas luthang kag iban pa nga ginadumilian nga kagamitan.
Ginabanta nga magalab-ot sa 350,000 ang magadugok sa mga patyo sa syudad sang Iloilo umpisa subong nga Oktubre 31 tubtub sa Nobyembre 3.#
