****Trigger Warning: Mention of Abuse and Sexual Violence****
Gin-athag sang Korte Suprema nga mahimo man makonsiderar nga biktima sang sexual violence ang mga lalaki kag dapat nga proteksyunan sang layi ang tanan nga mga biktima sang pagpang-abuso, bisan ano pa ang ila nga gender.
Ini nga landmark ruling ang kaangot sa pag-convict sa isa ka babaye nga akusado sa kaso nga statutory acts of lasciviousness sa idalom sang Article 336 of the Revised Penal Code.
Ginkasuhan ang babaye matapos sini nga gin-abusuhan sekswal ang iya 11-anyos nga hinablos nga lalaki.
Suno kay Senior Associate Justice Marvic Leonen sa desisyon nga ginsapubliko kahapon, Oktubre 30, wala sang gender nga ginapili ang sexual violence kag posible ini nga matabo sa kay bisan sin-o, apisar nga nagalain-lain ang reaksyon.
“Sexual violence devastates equally, regardless of gender. However, people may vary in their reactions and the way they cope with distressing situations,” sandig sa desisyon sang Supreme Court.
Nahibaluan nga natabo ang insidente sang Setyembre 7, 2018, kun sa diin ang mismo nga tiya sang 11-anyos nga biktima ang naghimulos sa iya, nga nagresulta sa iya pag-antos sang post-traumatic stress disorder (PTSD), anxiety, kag depression.
Ginpanginwala naman sang akusado ang mga alegasyon kag ginpahayag nga may pag-ugyon ang natabo sa ila. Dugang pa sini, ginpasakaan lamang siya sang kaso bangud sa away sa kustodiya sang iya utod nga amay sang biktima kag sang iya asawa.
Ginrason man sang akusado nga ang aktwasyon sang bata nga lalaki nagapakita nga nag-“enjoy” man ini sa natabo, apang suno sa high court, indi dapat paglauman nga maga-resist ukon maga-respond ang biktima sa isa ka partikular nga paagi kun gina-intimidate sila ukon napaidalom sa emotional stress.
“Victims of rape or sexual abuse should not be burdened to resist or to have a standard reaction when intimidated and under emotional stress,” pahayag sang Korte Suprema.
Dugang pa ni Leonen, indi dapat paghimuon nga basehan ang reaksiyon sang isa ka tawo sa insidente sang pagpang-abuso sa paghibalo sa kredibilidad sang iya pahayag, bangud lain-lain ang paagi sang mga biktima sa pag-atubang sa sini nga klase sang sitwasyon.
“The fact that a person’s reaction to an incident is different from what is deemed ‘standard,’ does not diminish the credibility of their claims,” siling sini.
Kaangot sini, ginsentensyahan sang korte ang akusado sang minimum nga siyam ka tuig, apat ka bulan kag isa ka adlaw nga prision mayor, tubtob sa maximum nga 16 ka tuig, lima ka bulan kag siyam ka adlaw nga reclusion temporal.
Gmanduan man ini nga magbayad sang P250,000 sa civil indemnity kag damages.
