Nagpanawagan si Presidente Ferdinand “Bongbong” Marcos Jr. sa publiko nga ipakita sa ila isigkatawo ang pareho nga debosyon kag pagpalangga nga ginahatag nila sa ila pagdumdom sa ila mga pinalangga nga nagtaliwan na.
Sa iya mensahe subong nga Nobyembre 1 kadungan sang pagsaulog sang All Saints’ Day, ginhingyo sang Presidente ang mga Katoliko nga ilugon ang kaayo kag pag-alagad sang mga Santo sa ila isigkapareho.
“We also draw inspiration from the saints, whose devotion found expression in selfless service, and from countless individuals whose sacrifices have sustained our communities. Their lives call on us to make the most of the time entrusted to us, and to find lasting purpose in every kindness we give and every burden we help carry for others,” pahayag sini.
Suno pa kay Marcos, dapat man maghatag sang tion ang kada isa agud pamatian kag buligan ang mga tawo nga naga-agi sa kabudlayan.
Ginpat-od niya nga mas importante ang kaayuhan nga ginahimo sa iban sangsa mga pulong nga ginahambal lang ukon mga monumento nga ginabilin.
Dugang pa sang Presidente, ang pagdumdom sa mga nagtaliwan padayon nga nagapalig-on sang pagbinuligay kag paghiusa sang mga pamilya nga Pilipino kag sang bug-os nga pungsod sa tunga sang mga pagpanghangkat.
“I invite everyone to practice the same devotion we show in remembrance into the way we treat one another. If we can make time to revere those who have passed, we can also make room to listen to those who struggle, and let that same concern guide our society and the work of government. May our efforts in nurturing a Bagong Pilipinas stand as a greater testament to our lives than any words or monuments carved in stone we leave behind,” suno pa sa Presidente.
Pareho nga special non-working holidays ang Nobyembre 1 kag 2 para sa pag-obserbar sang All Saints’ Day kag All Souls’ Day.
Nauna na nga ginpasiguro ni Marcos nga naghimo sang kinahanglanon nga pagpanghanda ang gobyerno agud masiguro ang luwas kag matalunsay nga pagbyahe sang mga Pilipino nga magapauli sa ila mga probinsya ukon magkadto sa iban nga lugar subong nga Pista Minatay.
Nahibaluan nga personal nga nagbisita si Marcos sa lulubngan sang iya nga amay nga si former President Ferdinand E. Marcos Sr. sa Libingan ng mga Bayani subong nga adlaw. Sa iya Facebook post, makit-an nga nag-upod man sa pagbisita si anay First Lady Imelda Marcos.
Nagpadala man si Marcos sang mga bulak sa lulubngan nanday former Sen. Benigno “Ninoy” Aquino Jr. kag former presidents Corazon “Cory” Aquino kag Benigno “Noynoy” Aquino III sa Manila Memorial Park sa Parañaque City.
Si Ninoy amo ang leading opposition figure sang panahon sang amay nga Marcos.#
