Panason na ang pedestrian lane sa atubang sang Iloilo City Police Office (ICPO) sa General Luna Street kag himuon na lamang nga emergency U-turn slot para sa kapulisan.
Ini ang ginpahayag sang head sang Iloilo City Traffic and Transportation Management Office (ICTTMO) nga si Retired Colonel Uldarico Garbanzos kasunod sang coordination meeting kaupod sa Department of Public Works and Highways (DPWH), City Engineers’ Office (CEO), Land Transportation Office (LTO), ICPO, kag iban pa.
Suno kay Garbanzos, nagsugtanay sila sa amo nga rekomendasyon kasunod sang paglantaw sa pila ka mga rason.
Sa inspeksyon suno sa natungdan, nakit-an nga kun magpanaog sa Jalandoni Flyover, yara gilayon ang pedestrian lane sa atubang sang ICPO, kag masami pa nga ginatapakan sang mga public utility jeepneys bangud nga covered sini ang Loading kag Unloading Area.
Pahayag sini, may isa pa gid ka pedestrian lane nga nahamtang ginabanta halos 30 metros lang halin sa amo nga area, gani nga nakasugtan nila nga isahon na lang nga amo ang yara sa atubang sang University of San Agustin.
Ginklaro man niya nga ang paghimo sang emergency U-turn slot indi dapat magresulta sa paglapas sa pedestrian safety, bangud ang tuyo sang proposal amo ang pagbalanse sang kinahanglanon sang mga nagalakat kag sang emergency response sang kapulisan.
“Kadamo sang dapat nga respondehan. Dapat nga ang aton ICPO kun maghalin dira sa area nila, lalo na ang SWAT, ang mobile patrol units nila, ang ila nga traffic investigation section… ang Station 1, in a call for police assistance, mangin madasig. Ina gina-intindi naton kag gina-consider naton so that ang aton City Police madasig nga maka-react sa tanan nga mga called-for police assistance,” pahayag sini.
Dugang niya: “Kuhaon naton ang pedestrian lane, and then i-maintain na ina as the emergency U-Turn slot sang aton nga Iloilo City Police Office.”
Matandaan nga sang damlag lang, madamo sang nagkwestyon matapos nakit-an ang patrol vehicle sang ICPO Women and Children Protection Desk (WCPD) nga nag-U-turn sa pedestrian lane sa gwa sang city police headquarters.
Ini ang rason nga nagpanawagan si LTO Region 6 director Gaudioso Geduspan nga mag-review sa existing traffic policy sa area.#
