Nasubuan kag naakig si anay Presidente Rodrigo Roa Duterte sa mga ginahimo nga pagpanglagas sa iya mga kaalyado kag supporters sa baylo nga tutukan sang gobyerno ang mga nagapanguna nga kinahanglanon sang Pilipinas.
“He is saddened and very angered by the fact that the taxpayers’ money is being focused sa pagpadakop sa kanang mga kaalyado nato, mga supporters, instead of the more important things,” suno sa bata sang former president nga si Veronica “Kitty” Duterte sandig sa interview nga na-post sa Facebook page nga Alvin & Tourism.
Ginhinambit ni Kitty ang El Niño nga amo ang dapat nga i-address.
“Like right now, may El Niño, ‘di ba? And several other things like flood control projects, budgets for the more important things, for the needs, the basic needs of the Filipino people,” pahayag sini.
Madumduman nga nag-anunsyo ang gobyerno sang P50 million nga balor sang padya para sa impormasyon nga magatudlo kay Senator Ronald “Bato” dela Rosa nga isa sa mga kilala nga kaalyado ni Duterte.
May arrest warrant nga ginpagwa ang International Criminal Court (ICC) batok kay Dela Rosa may kaangtanan sa drug war sang administrasyon nga Duterte nga nagresulta sa kamatayon sang linibo ka mga tawo.
Si Dela Rosa amo ang hepe sang Philippine National Police (PNP) sang amo nga tion; apang subong, ginakonsiderar ini nga pugante nga senador.
Samtang, padayon nga naka-detain si anay Presidente Duterte sa ICC detention facility sa The Hague, Netherlands, samtang ginahulat ang trial sa iya kaso nga crimes against humanity nga natalana nga magsugod sa Nobyembre 30.
Panawagan naman ni Kitty sa mga Pilipino, dapat nga magpabilin nga mabakod sa ila panindugan batok sa mga ginapatihan nga inhustisya nga ginaatubang sang pungsod.
“All I can say is that now more than ever, we have to remain steadfast in our conviction and on our stand against all the injustices we are facing as a people, as a nation, because we are the only ones who can stop this,” pahayag sang anak nga Duterte.
Nahibaluan nga ang iya magulang nga si Vice President Sara Duterte ang nagapangatubang man sang impeachment case. Maga-resume ang trial sa Lunes, Nobyembre 9.#
