Ginakontra ni Pangasinan 2nd District Representative Mark Cojuangco kag Chairperson sang Special Committee on Nuclear Energy, Philippine House of Representatives, ang mga panawagan nga ibaligya sa pribado nga korporasyon ang Bataan Nuclear Power Plant (BNPP).
Sa interview sang Bombo Radyo kay Congressman Cojuangco, iya ginpabug-atan nga dapat ang publiko mismo ang makabenepisyo sa nasambit nga planta.
Suno sa iya, naglab-ot sa 2.12 billion US dollars ang gasto sa BNPP, lakip ang principal ukon panguna nga gasto nga naglab-ot sa 1.421 billion dollars kag 699 million dollars nga out-of-pocket expenses kun sa diin nabayadan na ini sang Hulyo 2007, kag ang kwarta nga gin-gamit ang naghalin sa bulsa sang mga Pilipino.
Pagpaathag sang kongresista, naghulat na ang publiko sang halos 40 ka tuig agud mabatyagan ang benepisyo sang nasambit nga planta, gani, dapat ang katawhan mismo ang makabenepisyo sa kita sini, nga mahimo pa magamit sa pagtukod sang dugang nga nuclear power plants sa pungsod.
Ginpunto niya, ang mga nuclear power plants sa Pilipinas ang dapat ginapanag-iyahan sang gobyerno kag mahimo lamang magpartisipar ang pribado nga sektor sa konstruksyon, operasyon kag maintenance.
Ginapanawagan man ni Congressman Cojuangco nga mapasa ang Nuclear Integration Act ukon House Bill No. 08567 antes matapos ang termino ni President Ferdinand Marcos Jr. kag dapat man nga ma-appoint na sang presidente ang mga opisyal sang Philippine Atomic Energy Commission (PhilAtom) agud mahimo ini nga mag-operate bilang independent nuclear regulator.
Dugang pa niya, indi dapat pag-ibaligya sang presidente ang BNPP, sa baylo, gamiton ini bilang equity sang Pilipinas sa nuclear industry, agud ang publiko mismo ang mangin tag-iya kag makabenepisyo sa nuclear energy.
