Nagalaum si Iloilo City Vice Mayor Lady Julie Grace “Love-Love” Baronda nga hatagan sang importansya kag mangin kabahin sang prayoridad sang administrasyon ni Iloilo City Mayor Raisa Treñas ang iya ginpropose nga pagpatukod sang three-digit centralized emergency hotline.
Sa interview sang Bombo Radyo kay Baronda, iya ginpahayag nga dako ang mahimo nga mabulig sang nasambit nga sistema sa pumuluyo bangud mas mapadasig sini ang pagresponde sang emergency responders, nga nagakinahanglan lamang sang P3 million nga pondo.
“What is P3-M kung mahatagan budget ang emergency response para dasig ang pagresponde,” pahayag ni Baronda.
Ginpahayag man sang bise alkalde nga gintiguhaan niya nga ma-upod ang proyekto sa Annual Investment Program (AIP), apang wala ini na-prioritize matapos nga suno man sa pahayag ni City Councilor Jose Maria “Nene” De La Llana nga wala sang budget para sa pagpatukod sini.
Indi man makumpirmar ukon mapanginwala ni Baronda nga “natulugan” ang proposed ordinance sa committee ni De La Llana, nga suno sa mga nauna nga impormasyon, nagapabilin sa komitiba sa sulod sang isa ka tuig kag apat ka bulan.
Ginkwestyon man niya kung ngaa wala naistoryahan ang kakulangan sang pondo sa committee hearing kag kung may separado nga hearing nga nagpat-od nga wala sang budget para diri.
“Wala kuno budget ang hambal sa iya [Councilor De La Llana]. Didto man ko natingala nga kung wala budget, ngaa wala ini na discuss during the conduct of committee hearing? Was there a separate committee hearing nga naghambal ang City Budget Office nga wala budget?,” dugang pa ni Baronda.
Ginpaathag ni Baronda nga ang AIP amo ang listahan sang mga programa kag proyekto sang nagkalain-lain nga departamento sang City Hall nga mahimo mangin basehan sang executive branch sa pagkonsiderar sang priority programs kag projects para sa siyudad.
Dugang pa niya, nagalaum siya nga makita sang administrasyon ni Treñas nga ang nasambit nga inisyatibo magahatag sang benepisyo sa pumuluyo kag mangin kabahin sang mga prayoridad nga proyekto sang siyudad.
