Wala ginbaton sang prosecution panel ang pahayag sang spokesperson ni Vice President Sara Duterte nga napaslawan ang ila kampo sa pagdepensa sang ebidensya sa nagapadayon nga impeachment trial batok sa Bise Presidente.
Suno kay House prosecutor kag Bicol Saro Party-list Representative Terry Ridon, ang pagbaton sang impeachment court sa ila mga ebidensya ang isa ka pamatuod nga wala sila napaslawan.
Gindugang man ni Ridon nga ang impeachment trial indi paindis-indis sa popularidad kundi proseso agud mapamatud-an ang mga alegasyon batok sa Bise Presidente.
Samtang, ginpahayag naman ni House prosecution spokesperson Jay Tolosa nga indi mapatihan ang pahayag sang kampo ni Duterte sa ila preparasyon nga magpresentar sang 24 ka testigo.
Ginpasiguro man ni Tolosa nga handa ang prosekusyon nga atubangon ang bisan sin-o nga testigo sang depensa, lakip na si Duterte mismo.
Ginpangabay man sang prosekusyon nga indi na pagpasugtan ang pagpresentar sang ebidensya nahanungod sa tatlo ka ginbawi nga articles of impeachment kag ituon na lamang sa nabilin nga alegasyon sang unexplained wealth.
Nahibaluan nga magapadayon alas-10 buwas nga adlaw sang Lunes, Nobyembre 9, ang impeachment trial batok sa bise presidente.
