Ginpabug-atan sang Sigla Research Center nga mahimo maapektuhan ang edukasyon, access sa impormasyon kag pagpreparar sang mga kabataan sa digital world sang gina-propose nga social media ban sa mga minors.
Sa interview sang Bombo Radyo kay Rossine Fallorina, Managing Director sang Sigla Research Center, iya ginpahayag nga daku na ang papel sang social media sa edukasyon, bangud ginagamit ini sang mga estudyante kag manunudlo sa research, pagkuha sang impormasyon, kag pag-coordinate sang school activities lakip ang paggamit sang messaging services pareho sang Messenger.
Suno kay Fallorina, ginagamit man sang mga kabataan ang social media sa pagbasa sang balita kag pagdiskubre sang mga isyu sa ila palibot, gani, mahimo magbag-o ang sistema sang edukasyon kon indi na sila makagamit sini.
Ginkabalak-an man niya nga mahimo indi mangin bastante ang digital skills sang mga kabataan kon wala na ang mga ini sang oportunidad nga makatuon kag maka-experience sang online platforms samtang nagadaku bangud nga ini ang tuman ka importante kasunod sang madamo na sang trabaho ang nagakinahanglan sang kaalam sa paggamit sang digital technologies.
Pahayag pa ni Fallorina, mahimo man maapektuhan ang competitiveness sang mga kabataan sa Pilipinas kon ikumparar sa mga estudyante sa neighboring countries nga mas may exposure sa digital technologies.
Ginpunto niya nga bisan pa may mga problema sa online bullying kag harassment, indi dapat kuhaon sa mga kabataan ang oportunidad nga makatuon kag makakuha sang impormasyon.
Sa baylo, ginapanawagan niya ang pagpasanyog sang media literacy, digital literacy kag online safety education agud matudluan ang mga menor sang responsable nga paggamit sang social media.
Ginpabug-atan man niya nga kinahanglan man nga mas mapabaskog ang kapasidad sang law enforcement agencies sa pag-atubang sang online scams kag iban pa nga krimen, agud mas epektibo nga maimbestigaran kag mahatagan sang nagakaigo nga tikang ang online crimes.
Ginpahayag pa ni Fallorina, kinahanglan balansehon ang online safety kag ang oportunidad sang mga kabataan nga makatuon, makakuha sang impormasyon kag mangin handa sa digital world.
Dugang pa niya, importante gid sa gihapon ang paggiya sang mga ginikanan, komunidad kag gobyerno sa responsable nga paggamit sang social media.
