Ginaprayoridad ang dose ka barangay sa Iloilo City nga ma-deklarar nga drug-cleared halin sa kapin 30 ka barangay nga padayon pa nga yara sa proseso sang drug clearing.
Suno kay Iloilo City Police Office (ICPO) Director Police Colonel Wilbert Parilla, ginatutukan karon ang nabilin nga mga barangay, nga ang kalabanan nga rason kung ngaa wala pa ini ma-clear amo ang madamo pa nga drug personalities nga wala na-account kag subject pa sa drug operations.
Ginpahayag niya nga nagahulat na lamang sila sa availability sang Philippine Drug Enforcement Agency (PDEA) kag iban pa nga concerned agencies agud mapadalagan ang proseso kag mahatagan sang deklarasyon ang mga barangay nga kwalipikado na nga mangin drug-cleared.
Ginklaro man ni Parilla nga indi nagakahulugan nga wala na sang illegal drug activities sa isa ka barangay bangud lamang nga na-deklarar ini nga drug-cleared.
Pahayag pa niya, ang pinaka-prayoridad sang Barangay Drug Clearing Program amo ang pag-identify kag pag-account sang tanan nga drug personalities, lakip ang mga drug users, pushers kag iban pa nga may kaangtanan sa illegal drugs.
May yara man sang annual retention kag revalidation agud masiguro nga nagapabilin nga kwalipikado ang isa ka barangay sa drug-cleared status.
Kung indi na sini ma-maintain ang mga requirements para sa retention, mahimo ini nga ibalik sa uncleared status.
Apang gin-athag ni Parilla nga tubtob sa karon, wala pa sang barangay sa Iloilo City nga na-revert ukon naibalik sa uncleared status.
Dugang pa niya, wala sang specific timetable sa pag-clear sang tanan nga barangay bangud nagadepende ini sa drug situation kag resulta sang assessment sa kada komunidad.
Indi man, suno sa iya, nagakahulugan nga wala nagatrabaho ang mga barangay nga wala pa ma-deklarar nga drug-cleared, bangud nagalain-lain ang sitwasyon kag lebel sang drug problem sa kada lugar.
Nahibaluan nga 134 nga barangay ang drug-cleared halin sang 2017 tubtob subong nga tuig kung sa diin 22 ka barangay ang drug-cleared, 29 ka barangay ang na-retain ang ila status kag 9 ka unaffected barangay ang gina-verify para mangin drug-free.
Text by: Bombo Cyrene A. Nasis
