Ginapasangkad sang Iloilo City Government ang pagmonitor sa mga eskwelahan agud matumod ang mga estudyante nga naga-absent.
Suno kay Mayor Raisa Treñas, gina-contact na sang iya team ang mga estudyante nga wala nagasulod sa klase agud mahatagan sang nagakaigo nga check-up kag dengue testing.
Suno sa alkalde, nagtaas ang dengue cases sa siyudad kumpara sang nagligad nga tuig, gani ginapalig-on pa ang preventive measures, lakip ang pagpakig-angot sa mga eskwelahan.
Base sa datos sang City Health Office (CHO), naglab-ot na sa 785 ang dengue cases sa Iloilo City, nga may walo ka fatality, halin Enero 4 tubtob Oktubre 31, 2026. Mas mataas ini sang 37.7 percent kumpara sa kapareho nga period sang 2025.
Samtang, ginpanawagan ni Treñas sa publiko nga magpakonsulta gilayon kung may low-grade fever bangud mahimo ini nga sintomas sang dengue.
May yara sang Dengue Fast Lanes sa mga District Health Centers kag libre nga dengue testing para sa mga nagakinahanglan.
Dugang pa ni Treñas, nagapadayon man ang monitoring sa mga barangay, misting operations, pagbutang sang larvicide kag pagpalig-on sang Barangay Dengue Task Forces.
Text by: Bombo Cyrene A. Nasis
