Nagpaandam ang isa pediatric infectious disease specialist sa mga estudyante kag ginikanan nga mas mangin mabinantayon batok sa dengue ilabi na subong nga may klase kag madamo sang posible nga mangin breeding grounds sang lamok sa palibot.
Sa interview sang Bombo Radyo kay Dr. Thomas Saiton Jr., iya ginpahayag nga ang stagnant water sa sulod kag sa palibot sang eskwelahan ang ideal breeding ground para sa mga lamok nga nagadala sang dengue virus.
Gin-abisuhan man sini ang mga estudyante nga maglikaw nga magpalapit sa mga lugar nga madamo sang lamok.
Mas maayo man nga magsuksok sang mga bayo nga may malaba nga sleeves, long pants, kag medyas, partikular sa ‘early morning’ kag ‘late afternoon’ nga amo nga oras nga pinakaaktibo ang dengue-carrying mosquitoes.
Ginsiling man ni Dr. Saiton nga ang mga school-aged children ang may pinakamataas nga risgo bangud mas aktibo ang mga ini kag mas mahapos sila makagat sang lamok.
Importante man suno sa iya nga indi gid pagbalewalaon sang mga ginikanan ang mga sintomas kaangay sang hilanat, sakit sang ulo, pagsakit sang mata, kag pagpalanakit sang lawas bangud importante ang early medical consultation kag dengue testing ilabi na nga ang iban nga balatian ang may pareho man nga sintomas.
Liwat man sini nga ginaengganyo ang publiko nga magsunod sa 5S Strategy against dengue: Search and Destroy mosquito breeding sites, Self-protection, Seek early consultation, Support fogging, kag Sustain hydration.
