Ginaabi-abi sang pila ka mga tricycle driver ang pagnubo sang presyo sang gatong.
Sa interview sang Bombo Radyo kay alyas Reynold, isa ka tricycle driver sa Jaro, iya ginpahayag nga madugay na nila nga ginalauman ang pagnubo sang presyo sang gatong ilabi na sa subong nga tion nga kinahanglan gid nila magkinot.
Apang suno sa iya, indi sa gihapon makabig nga daku ang pagnubo sang presyo bangud mahal pa ini, kag nagalab-ot pa sa kapin ₱89 tubtob ₱92 ang kada litro sang diesel, samtang ₱69 tubtob ₱70 naman ang kada litro sang iban pa nga produktong petrolyo.
Dugang pa niya, mabug-at sa gihapon sa bulsa ang presyo sang gatong para sa ila nga mga tricycle driver bangud indi na pareho sang una ang sitwasyon sang ila pagpangita sang palangabuhian, ilabi na nga nagadamo man ang mga tricycle driver.
Sa karun, padayon nga nagalaum ang mga driver nga magapadayon pa ang pagnubo sang presyo sang mga produktong petrolyo sa mga palaabuton nga adlaw.
