“𝑨𝒇𝒕𝒆𝒓 𝒇𝒊𝒗𝒆 𝒚𝒆𝒂𝒓𝒔 𝒏𝒂 𝒅𝒂𝒚𝒐𝒏 𝒈𝒊𝒅 𝒎𝒂𝒏, 𝒅𝒖𝒈𝒂𝒚 𝒏𝒂 𝒏𝒊 𝑴𝒂𝒚𝒐𝒓 𝑱𝒆𝒓𝒓𝒚 𝒈𝒊𝒏𝒂𝒑𝒂𝒏𝒈𝒂𝒚𝒐. 𝑲𝒖𝒏𝒈 𝒘𝒂𝒍𝒂 𝒈𝒊𝒅 𝒈𝒊𝒏-𝒅𝒖𝒈𝒂𝒏𝒈𝒂𝒏 𝒔𝒂𝒏𝒈 𝒄𝒊𝒕𝒚 𝒈𝒐𝒗𝒆𝒓𝒏𝒎𝒆𝒏𝒕 𝒔𝒂𝒏𝒈 𝒃𝒖𝒅𝒈𝒆𝒕, 𝒘𝒂𝒍𝒂 𝒈𝒊𝒅 𝒏𝒂 𝒅𝒂𝒚𝒐𝒏. 𝑰 𝒉𝒐𝒑𝒆 𝒏𝒈𝒂 𝒎𝒂𝒌𝒂 𝒃𝒖𝒅𝒈𝒆𝒕 𝒏𝒂𝒎𝒂𝒏 𝒔𝒖𝒏𝒐𝒅. 𝑲𝒖𝒏𝒈 𝒌𝒂𝒚𝒂 𝒎𝒂𝒏 𝒍𝒂𝒏𝒈 𝒔𝒂𝒏𝒈 𝒔𝒊𝒚𝒖𝒅𝒂𝒅, 𝒖𝒃𝒓𝒂𝒉𝒐𝒏 𝒏𝒂 𝒍𝒂𝒏𝒈 𝒏𝒂𝒕𝒐𝒏 𝒑𝒂𝒓𝒂 𝒎𝒂𝒕𝒂𝒑𝒐𝒔 𝒏𝒂 𝒏𝒊 𝒂𝒏𝒈 𝒂𝒕𝒖𝒏 𝒏𝒈𝒂 𝒑𝒓𝒐𝒋𝒆𝒄𝒕 [𝑪𝒂𝒅𝒂𝒔𝒕𝒓𝒂𝒍 𝑳𝒊𝒏𝒆 𝑫𝒆𝒍𝒊𝒏𝒆𝒂𝒕𝒊𝒐𝒏 𝑺𝒖𝒓𝒗𝒆𝒚]” — Iloilo City Mayor Raisa Treñas
Gin-asikaso na ni Iloilo City Mayor Raisa Treñas ang pagtalana sang pondo para masugodan na ang Cadastral Line Delineation Survey sa distrito sang Jaro kag La Paz.
Ini matapos ang kapin lima ka tuig nga paghulat kag pagpangayo sang pondo gikan sa national government para sa proyekto nga ginsuguran pa ni anay Iloilo City Mayor Jerry Treñas.
Ginpahayag ni Treñas nga bangud wala pa masiguro kung diin magasulod ang budget sang Department of Environment and Natural Resources (DENR)-6 para sa nasambit nga survey, nagdesisyon ang siyudad nga magpain sang inisyal nga P3 milyon kag gindugangan pa gid sang dugang nga tatlo ka milyon ka pesos agud malab-ot ang kabug-usan nga P6 milyon nga counterpart para sa katumanan sang survey.
Gani, dako ang pagpasalamat ni Treñas sa katumanan sang sini nga kasuguan matapos ang pila ka tuig nga pagtinguha.
Ginalauman nga paagi sa sini nga delineation survey, mahibaluan ang husto nga linya sang tubig kag mga easement agud maprepararan ang nagakaigo nga relocation sites para sa mga informal settlers nga nagaistar sa mga danger zones.
Nahibaluan nga subong nga adlaw, Nobyembre 12, nagpatigayon sang Memorandum of Agreement (MOA) signing ang Iloilo City Government kaupod si Department of Environment and Natural Resources (DENR)-6 Regional Executive Director Atty. Ramar Neil V. Pascua.
Ang nasambit nga agreement, nagamandu sa DENR-6 nga tapuson ang survey sa sulod sang isa ka tuig.
Text by: Bombo Cyrene A. Nasis
