Nagaplano ang Iloilo City Government nga magbakal sang dugang nga duha ka water tankers nga may kapasidad nga 4,000 liters agud mapabakod ang preparasyon sang siyudad sa posible nga kakulang sang suplay sang tubig bangud sa nagalaka-laka nga pag-ulan.
Suno kay General Services Office (GSO) Head Engineer Neil Ravena, ini nga plano magadugang sa existing nga anom ka water tankers, nga ang isa halin sa City Environment and Natural Resources Office (CENRO) kag lima ang ginapanag-iyahan sang GSO.
Dugang pa diri, may ara man sang mga static water tanks nga may kapasidad nga 2,000 liters nga handa na para sa deployment sa mga barangay nga na-identify nga vulnerable sa water shortage.
Ginabulubanta nga makabutang sang duha ka static tanks sa kada barangay, samtang ang kada water tanker mahimo magserbisyo sa isa ka barangay kag maka-deliver sang tatlo tubtob apat ka trips kada adlaw.
Apang, ginpahayag ni Ravena nga kabahin lamang ini sang ila first response, bangud kinahanglan man nga masiguro ang padayon nga suplay sang tubig kag ang logistics antes magpatuman sang aktuwal nga distribusyon.
Sa subong, wala pa sang barangay nga nagapangayo sang water tanker, samtang nagapadayon ang survey sa paggamit sang tubig halin sa shallow wells.
Sa masunod nga semana, magapatigayon man sang monitoring kag survey sa 25 identified barangays agud mahibaluan ang volume sang tubig nga kinahanglan sang mga residente.
Text by: Bombo Cyrene A. Nasis
