Dismayado ang prosecution team sa mga testigo kag ebidensiya nga ginpresentar sang defense team ni Vice President Sara Duterte sa impeachment trial.
Suno kay House Lead Prosecutor Gerville Luistro, matapos ang tatlo ka semana nga break, ginapaabot sang prosecution nga mabatian ang sabat sang depensa sa mga alegasyon batok sa bise presidente.
Ginapaabot man nila nga may mga eksplosibo nga testimonya kag ebidensiya nga ipresentar ang defense team.
Apang, suno kay Luistro, daw watusi lamang ang kabaskugon sang presentasyon sang depensa, rason nga dismayado ang mga ini.
Matandaan nga ang mga testigo nga ginpresentar sang defense team amo sanday: City Assessor Engr. Jaime G. Adali; City Assessor Engr. John Kenneth Enumerables; City Accountant Vingelin Bajan; Atty. Suzette Balucanag-Punay Corporate Counsel, GenCorp Industries Inc. kag Metro City Chow Foods Corp.
Lakip man sa mga nangin testigo sanday: Atty. Anel Martin S. Antero kag Chadrin S. Parian.
Dugang pa ni Luistro, wala nila nakita ang klase sang mga ebidensiya nga ila ginapaabot, ilabi na matapos ang mabatian ang nangin findings ni financial forensic expert Atty. Alex Cabrera, nga nagpresentar sang iya analysis sa financial records kag ang ginaapatihan nga unexplained wealth sang bise presidente kag iya bana nga Atty. Manases Reyes Carpio.
Nahibaluan nga wala sang impeachment trial nga ginapatigayon subong nga adlaw, Nobyembre 13, matapos nga naghingyo ang defense team sa pagkansela sang hearing bangud sa ASEAN Summit kag sa deklarasyon sang holidays, amo man ang wala sang may naka-schedule nga witness sa nasambit nga petsa.
