Naghatag sang sabat si Iloilo 5th District Representative April “Binky” Tupas sa privilege speech ni Iloilo 5th District Board Member Rolex T. Suplico nga nagatumod sa ginatawag nga “epal” kag paggamit sang mga proyekto sang gobyerno para sa political promotion.
Sa mensahe nga ginpadala ni Tupas sa Bombo Radyo, ginpahayag sini nga para sa iya, ang ginahimo ni Suplico isa ka porma sang pamulitika sa quinto distrito.
Suno sa iya, indi sila magsakay sa ginatawag niya nga diskarte ni Suplico, bangud mas ginapili nila nga hatagan igtalupangod ang sitwasyon sang mga pumuluyo nga nagabatyag sang epekto sang El Niño kag nagaatubang sang iban pa nga mga pagtilaw.
Ginpanawagan man niya ang kooperasyon sang tanan nga public servants kag concerned citizens, sa baylo nga mag-focus sa mga indi kinahanglanon nga pagbinanggianay sa tunga sang mga opisyal.
Ginpahayag man ni Tupas nga magapadayon sila sa pagserbisyo para sa mga pumuluyo.
Ang iya pahayag amo ang sabat sa privilege speech ni Suplico nga may titulo nga “Pure Epal,” kun sa diin ginpangayo sang board member ang hugot nga pagpatuman sang DILG Memorandum Circular No. 2026-006 nga nagadumili sa pagbutang sang mga pangalan kag laragway sang mga public official sa mga proyekto sang gobyerno.
Text by: Bombo Lynd-C Bade
