Arestado ang siyam ka mga indibidwal matapos ginpunggan sang mga pulis ang pagmartsa sang mga raliyista pakadto sa Cultural Center of the Philippines (CCP) Complex sa Pasay City kun sa diin ginapatigayon ang 49th ASEAN Summit and Related Summits.
Sa statement nga gin-release sang Kilusang Mayo Uno (KMU), ginatawag sini nga “violent” ang pagpahalin sang mga pulis sa mga nagaprotesta nga nagmartsa halin sa Liwasang Bonifacio sa Manila pakadto sa Pasay City.
Suno sa grupo, may pila man ka nagaprotesta nga nasamaran sa insidente kag gin-akusahan sini ang mga pulis sang Manila Police District sang pagpang-harass.
Ginkondenar man sang Alliance of Concerned Teachers (ACT) ang ginatawag sini nga police brutality ukon pagpang-abuso sang mga pulis batok sa mga nagaprotesta.
Suno sa grupo, luyag lamang sang mga nagaprotesta nga mapamatian ang ila mga reklamo kag ipabutyag ang ila mga kabalaka.
Ginpahayag man sang grupo nga indi sila mapahog ukon ma-intimidate sa mga pagpamahog sang mga nagapatuman sang kasuguan.
Una na nga ginpahibalo sang nagkalain-lain nga grupo ang ila plano nga magmartsa pakadto sa CCP Complex kun sa diin nahamtang ang Philippine International Convention Center (PICC) nga amo ang nagapanguna nga venue sang summit.
Ginpahayag sang mga grupo nga malinong nga protesta lamang ang ila tuyo.
Samtang, suno naman kay Palace Press Officer Claire Castro, luyag ni President Ferdinand Marcos Jr. nga mangin maayo ang pagpatigayon sang ASEAN Summit agud mapakita sa iban nga pungsod ang matahum nga imahe sang Pilipinas.
Nagpanawagan si Castro nga magbinuligay kag mag-isa anay ang mga Pilipino agud mapaayo ang pungsod kag masuportahan ang presidente kag ang administrasyon, sa baylo nga magpatigayon sang mga aktibidad nga mahimo makaapekto sa imahe sang nasyon sa atubangan sang iban nga mga pungsod.
“Ang Pilipinas po ang siyang chair ng ASEAN Summit at ang nais ng Pangulo ay maging maayos, maganda ang Pilipinas. Ito ay para sa kinabukasan ng mga Pilipino dahil ito ang panahon kung paano natin maipapakita sa ibang bansa ang kagandahan ng Pilipinas,” suno kay Castro sa press briefing.
“Kaya nga po sa panahon ngayon dapat tayo ay nagkakaisa, huwag natin dumihan ang imahe ng Pilipinas sa ibang bansa. Sana lang, magtulong-tulungan po tayo iangat ang Pilipinas, tulungan natin ang Pangulo, tulungan natin ang administrasyon. Huwag na muna sana tayo magsagawa ng anumang isyu,” dugang sini.
Samtang, ginpasiguro sang National Capital Region Police Office ukon NCRPO nga ipatuman sang mga pulis ang maximum tolerance ukon paghatag sang pinakadaku nga konsiderasyon sa mga hublag-protesta, apang indi nila pagtugutan nga magpalapit ang mga nagaprotesta sa venue sang ASEAN Summit.














