Gin-athag sang isa ka eksperto nga indi lamang physical kag emotional health ang posible nga maapektuhan sang nagakatabo nga El Niño, apang, lakip man diri ang mental health sang mga tawo.
Sa interview sang Bombo Radyo kay Dr. Catherine Jane Eraldo, psychiatrist kag Medical Specialist II sang Iloilo Provincial Health Office, iya ginpahayag nga ang tuman nga kainiton mahimo magpataas sang stress level sang isa ka indibidwal nga nagaresulta sa ila pagka-iritable, pagkabalaka kag kabudlayan sa pagdumala sang nagkalain-lain nga emosyon.
Suno kay Eraldo, may duha ka klase sang epekto ang El Niño sa mental health sang tawo, nga ginakabig nga direct kag indirect effects.
Ginpahayag sini nga ang direct effect nagakahitabo bangud mismo sa sobra nga kainiton sang panahon nga mahimo magpataas sang stress hormones sa lawas, rason nga mahimo mabudlayan ang isa ka tawo sa pag-proseso sang emosyon, pati man sa pagdesisyon.
Samtang, ang indirect effect ukon outside factors naman may kaangtanan sa mga problema kag kabudlayan nga naga-contribute sa stress sang isa ka tawo, kaangay sang kakulangan sang tubig, kabudlayan sa pagpangita sang palangabuhian kag pagtaas sang presyo sang mga kinahanglanon nga balaklon, nga ilabi maeksperyensyahan sa subong nga heat index.
Dugang pa sini, ang mga nasambit nga sitwasyon mahimo magdugang sa ginabatyag nga pressure kag kabalaka sang mga tawo, ilabi na sa mga pamilya nga direkta nga naapektuhan ang palangabuhian kag adlaw-adlaw nga kinahanglanon bangud sa nagapadayon nga kainiton, kaangay sang mga mangunguma kag manug-isda.
Sa karun, iya ginpahanumdom sa publiko ang importansya sang pagbinuligay kag paghatag sang pasensya sa isa kag isa, ilabi na nga nagaatubang ang komunidad sa epekto sang kainiton.














