Ginbawian gid sang ka kabuhi ang isa ka pulis matapos aksidente sini nga natiruhan ang iya kaugalingon sa Brgy. Caranoche, Sta Catalina, Negros Oriental.

Ang biktima amo si Patrolman Leonard James Fajardo, 27-anyos, kag assigned sa Regional Holding and Accounting Section (RHAS) sang Police Regional Office-Negros Island Region.

Natabo ang insidente sang Nobyembre 13 kadungan sang selebrasyon angot sa paggradwar ni Fajardo sang Nobyembre 10 sa Basic Internal Security Operations Course sa idalom sang Regional Special Training Unit- Negros Island Region training site sa Brgy. Kabukalan sa amo nga banwa.

Kaupod sini nga nagainom ang iban man nga mga pulis.

Base sa imbestigasyon, ginkuha ni Fajardo ang iya cal. 9mm service pistol kag gindemonstrar kun paano maggamit sang pusil.

Sa malain nga palad,aksidente sini nga napitik ang gatilyo kag naigo ini sa agtang nga gintunaan sang iya kamatayon.

Ginhingagaw pa ini dala sa ospital apang wala na natabangan.