Ginaplano ni Iloilo City Mayor Raisa Treñas nga himuon nga kada tatlo ka bulan ang random drug testing sa mga empleyado sang Iloilo City Government.

Ini kasunod sang pagkadakop sang Station Drug Enforcement Team sang Iloilo City Police Station 2 sa isa ka 34-anyos nga job hire employee nga ginakabig nga High Value Individual (HVI) sa drug buy-bust operation sa Zone 1, Barangay Gustilo, La Paz sang nagligad nga semana.

Matandaan nga nakumpiskar sa subject ang isa ka sachet sang suspected shabu kag pito pa ka heat-sealed plastic sachets nga may ginabanta kabug-aton nga 55 gramos kag nagabalor sang kapin P374,000.

Suno naman kay Treñas, kinahanglan nga quarterly kag random ang drug testing agud malikawan ang kaangay nga insidente kag masiguro nga wala sang nagagamit sang iligal nga droga sa hanay sang mga empleyado sang lokal nga panguluhan.

Pahayag pa sini, na-istorya na niya si Executive Assistant Atty. Victor Gelvezon nga amo ang nagapanguna sa drug-clearing efforts sang syudad kun sa diin ila na-istoryahan ang dugang nga mga tikang agud mapasanyog pa ang ila programa kontra iligal nga droga.

Dugang sang alkalde, kapin 500 ka empleyado sang Iloilo City Government ang napaidalom sa pinakaulihi nga drug testing.#