Ginakundenar sang Bagong Alyansang Makabayan (BAYAN) Panay ang pagpugong kag pag-aresto sang kapulisan sa mga nagprotesta sa Liwasang Bonifacio sa Manila batuk sa pagbisita ni United States President Donald Trump sa Pilipinas.
Sa interview sang Bombo Radyo kay Elmer Forro, secretary general sang nasambit nga grupo, iya ginpahayag nga ang protesta sang mga Pilipino ang ginapatigayon agud ipakita nga indi welcome si Trump sa pungsod bangud sa mga plano kag polisiya nga ginaduso sini, lakip na ang Pax Silica.
Suno kay Forro, ginapamatukan nila ang nasambit nga inisyatibo bangud imbes nga makabulig sa pumuluyo, posible pa ini nga magresulta sa pagpang-agaw sang natural resources, lakip na ang mineral deposits, kag paghalit sa palangabuhian sang mga mangunguma kag indigenous communities.
Ginkwestyon man sini ang pagsalig sang gobyerno sa mga foreign investments kag mga polisiya nga suno sa iya, nagahatag sang bentaha sa mga dumuluong nga kapitalista imbes nga magpalig-on sa lokal nga negosyo kag maghatag sang maayo nga trabaho sa mga Pilipino.
Pahayag pa ni Forro, ang mga polisiya nga ginaduso sang United States kag mga international financial institutions pareho sang World Bank kag International Monetary Fund ang ginalantaw sang grupo nga may kaangtanan sa nagapadayon nga krisis sa ekonomiya, lakip na ang pagsaka sang presyo sang petrolyo kag iban pa nga mga produkto.
Ginpabug-atan man niya nga dapat respetuhon sang gobyerno ang kinamatarong sang mga Pilipino nga magpahayag sang ila opinyon kag magpatigayon sang protesta, bangud isa ang Pilipinas sa mga demokratiko nga pungsod.
Ginkwestyon man sini ang pahayag sang kapulisan nga indi pwede magpatigayon sang rally sa Liwasang Bonifacio, bangud isa ini ka designated freedom park kun sa diin mahimo maghiwat sang protesta nga wala nagakinahanglan sang permit.
Dugang pa, ginpabug-atan man ni Forro nga dapat unahon sang gobyerno ang interes sang pumuluyo kag indi ang interes sang mga dumuluong nga kapitalista sa pagpatuman sang mga polisiya kag proyekto sa pungsod.














