Wala nadayon ang pagpasar sa second and final reading sang proposed Comprehensive Youth Development Code Ordinance sang Iloilo City ni Sangguniang Kabataan (SK) Federation President Jelma Crystel Implica bangud wala makadesisyon ang majority sang konseho kung bala mahimo nga mangin co-author sang ordinansa si Iloilo City Vice Mayor Lady Julie Grace Baronda.
‎
‎Ini matapos nagmanifest si Baronda nga luyag niya mangin co-author sang proposed ordinance ni Implica, bangud madamo sa mga probisyon sini ang kaangay sang iya man nga gin-author nga ordinansa nga natuhoy sa Iloilo City Youth Development Council.
‎
‎Apang nangin sentro sang deliberasyon ang DILG Opinion No. 95, Series of 2025, nga gin-adopt sang Sangguniang Panlungsod sa ila Internal Rules of Procedure (IRP), nga nagalimit sa gahum sang bise alkalde sa pagboto kag pagpakigbahin sa deliberasyon sang konseho.
‎
‎Tungod sa wala pa masolbar nga isyu parte sa co-authorship ni Baronda, ginpili na lamang ni Implica nga bawion ang iya motion nga ipasar ang ordinansa sa second and final reading.
‎
‎Sa baylo, ginpasar na lamang ang proposed ordinance sa second reading agud hatagan pa sang tion ang konseho nga masolbar ang legal queries parte sa pag-manifest ni Baronda nga mangin co-author.

Text by: Bombo Cyrene A. Nasis