Pasakaan sang kaso sang Iloilo City Police Office ang 9 ka mga kalalakihan nga involved sa duha ka separado nga insidente sang kinagamo sa G-Park Resto Bar sa Barangay San Rafael, Mandurriao sang kaagahon sang Nobyembre 15.
Suno sa impormasyon sang kapulisan, una nga insidente ang natabo pasado alas-2:30 sang kaagahon kun sa diin apat ka indibidwal ang gin-aresto.
Samtang, lima naman ka kalalakihan ang nadakpan sa ikaduha nga insidente pasado alas-4 sang kaagahon.
Sa kabug-usan, siyam ka indibidwal ang nadakpan sang kapulisan, lakip ang isa ka menor de edad nga gindala na sa Women and Children Protection Desk (WCPD) para sa nagakaigo nga intervention.
Suno kay ICPO Director Police Colonel Wilbert B. Parilla, pasakaan sang kaso nga Alarms and Scandals kag Malicious Mischief ang mga involved.
Paandam man sini sa publiko nga wala ginapahanugutan sang kapulisan ang mga binuhatan nga nagadisturbo sang kalinong sang syudad.
Dugang pa niya, ang mga nagahimo sang kinagamo ang dapat manabat sa ila mga binuhatan.
Text by: Bombo Glenette Delit













