Ginaduso sang Pilipinas kag Japan ang regional cooperation agud masiguro ang bastante nga suplay sang mga produktong petrolyo kag masolusyunan ang posible nga oil supply disruptions sa Asia.

Suno kay Japanese Prime Minister Sanae Takaichi, plano sang Japan nga magtukod sang Asia Oil Security Task Force nga magahimo sang mga patakaran kon paano gamiton kag ipaambit ang mga reserba nga gatong sa tion sang emerhensya.

Plano man sang Japan nga gamiton ang mga oil storage facility nga wala ginagamit agud madugangan ang lugar nga paga-imbakan sang oil reserves sa rehiyon.

Ginpahayag man ni President Ferdinand Marcos Jr. nga ginapreparar na sang Pilipinas ang kaugalingon sini nga strategic petroleum reserve agud masiguro nga may bastante nga suplay sang krudo ang pungsod bisan pa may pag-untat sang suplay sa global market.

Dugang pa ni Marcos, bukas ang Pilipinas sa mga investment kag pagbinuligay sa energy sector, lakip na sa renewable energy, natural gas kag energy storage, bilang bahin sang pagpalig-on sang energy security sang pungsod.