Ginpanghatag na sang Iloilo City Government ang 500 ka tablets para sa mga elementary, high school learners kag college students sa siyudad.

Suno kay Iloilo City Mayor Raisa Treñas, una nga tion nga nakapanagtag ang city government sang tablets para mismo sa mga college students, agud mapalapad ang ila access sa teknolohiya nga importante sa current situation sang sistema sang edukasyon.

Ginpahayag man ni Treñas nga ang dugang nga P500,000 nga gin-commit para sa pagbakal sang tablets ang magabulig sa pagpadayon sang programa, ilabi na sa mga elementary kag high schools nga nagakinahanglan sang amo nga kagamitan.

Apang, amat-amaton pa ang pagpanagtag agud masiguro nga ang mga eskwelahan nga mas nagakinahanglan sang tablets ang mangin prayoridad.

Ang 500 ka tablets nga una nga na-distribute ang naghalin sa donasyon sang Philippine Amusement and Gaming Corporation (PAGCOR).

Suno kay Treñas, daku na ang papel sang teknolohiya sa edukasyon, gani importante nga mahatagan sang oportunidad ang mas madamo nga estudyante nga maka-access sa mga digital learning tools.

Ginpahanumdom man sini ang mga benepisyaryo nga atipanon ang ila nabaton nga tablets kag gamiton ini sa ila pagtuon.

Ginpahayag pa sang alkalde nga padayon nga suportahan sang Iloilo City Government ang edukasyon halin elementarya tubtob kolehiyo agud mas madamo nga Ilonggo ang makabaton sang oportunidad para sa mas maayo nga palaabuton.

Text 𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬