Naglab-ot sa P148.38 milyon ang balor sang illegal drugs kag expired regulated medicines ang ginpangsunog sang Philippine Drug Enforcement Agency VI (PDEA-6) sa thermal facility sang Panay Energy Development Corporation sa Brgy. Ingore, La Paz, Iloilo City kahapon nga adlaw, Nobyembre 19, 2026.
Sa interview sang Bombo Radyo kay Ma. Graziella Tanaleon, spokesperson sang PDEA-6, iya ginpahayag nga ang nasambit nga numero ang ginalakipan sang masobra 20,000 grams nga shabu, malapit 20 grams sang marijuana kag expired medicines nga nagabalor sang kapin ₱215,000 nga nagalakip sang pito ka medical kits, 17 ka vials, 404 ka ampoules kag 369 ka tablets.
Suno kay Tanaleon, ang nasambit nga mga droga ang gin-turn over sang nagkalain-lain nga Regional Trial Courts sa Iloilo City, Iloilo Province kag Bacolod City, lakip ang PNP Regional Forensic Units kag Negros Island Region (NIR).
Pahayag pa niya nga gintambongan sang nagkalain-lain nga ahensya sang gobyerno pareho sang Police Regional Office 6, Department of Justice kag mga korte, amo man ang katapo sang media ang nasambit nga akitbidad agud magserbe bilang mga saksi sa proseso.
Dugang pa niya, ang pagsunog sang mga iligal nga droga ang kabahin sang pagpatuman sang Section 21 sang Republic Act 9165 agud masiguro ang husto kag transparent nga pag-dispose sang mga drug evidence.













