Ginpakita sang defense team ni Vice President Sara Duterte ang mga dokumento kag litrato sang manufacturing facility sang Cale88 Foods Corporation bilang pamatuod sa virtual site inspection nga ginhimo sang 2021.

Ang nasambit nga mga litrato kag records gin-submit sa Department of Trade and Industry (DTI) matapos ang virtual inspection sang pasilidad sang kompanya.

Lakip sa mga nakita nga nagtambong sa virtual meeting si Dr. Lourdes Lebosada, nga una na nga ginpahayag nga dentista ni Duterte. Si Lebosada kag ang bana sang bise presidente nga si Atty. Mans Carpio ang may tagsa ka bahin ukon shares sa Cale88 sang gintukod ini sang 2021.

Ginkumpirmar man ni DTI Undersecretary Ceferino Rodolfo, nga testigo sang depensa subong nga adlaw, nga narehistro ang Cale88 sa Board of Investments bilang export enterprise.

Sa idalom sang sini nga klasipikasyon, kinahanglan nga indi magnubo sa 70 porsyento sang produksyon sang kompanya ang ginapadala ukon ginabaligya sa iban nga pungsod.

Matandaan nga ginaalegar nga may paid-up capital nga P125,000 ang Cale88.

Sa mga rekord nga ginpresentar sa trial, nagapakita nga naglab-ot sa P776 million ang pagsulod sang kuwarta sa kompanya, samtang P154-million naman ang nagguwa nga pondo. Samtang ang kabug-usan nga sales sang kompanya gin-report nga yara sa P23 million.

Nauna naman nga nagtestigo ang Anti-Money Laundering Council (AMLC) nga nakabaton ang Cale88 sang yara sa P319.32 million nga mga padala halin sa China kag Hong Kong.#