Gin-akusaran sang Malacañang si Vice President Sara Duterte nga ginabaliskad ang istorya agud pakalainon ang administrasyon ni Presidente Ferdinand Marcos Jr.

Ini matapos nagpahayag ang bise presidente nga nakabatyag siya nga indi siya safe sa pungsod subong.

Suno kay Palace Press Officer Claire Castro, wala sang dapat kahadlukan si Duterte bangud ini pa gani ang nagapamahog, kasunod sang alegasyon parte sa kasugtanan sang vice president sa isa ka kakilala sini nga assassin.

“Binabaliktad ng bise presidente ang kuwento para makapanira na naman siya. Walang kamatayang pagsisinungaling,” pahayag sini. “Hindi siya natatakot. Dahil siya ang nananakot gamit ang kanyang kasunduan sa kakilala niyang assassin.”

Gindugang man ni Castro nga mahimo nga ang ginakahadlukan sang Bise Presidente amo ang posibilidad nga magtestigo sa impeachment trial kag sabton ang mga pamangkot parte sa iya ginapatihan nga indi maathag nga ginhalinan sang manggad, ilabi na ang mga report kag rekord halin sa mga bangko, Anti-Money Laundering Council (AMLC) kag Bureau of Internal Revenue (BIR).

“Baka ang takot niya ay kung uupo siya at magtetestigo para sa kanyang sarili. Kakayanin ba niyang magsalita at pasinungalingan ang mga reports at records ng mga bangko, AMLC, BIR?” dugang pa sini.

Ang pahayag sang Palasyo kasunod sang akusasyon ni Duterte nga ginahimo na lamang nga instrumento sang mga politiko ang Philippine National Police (PNP).

Suno kay Duterte, nakabaton siya, ang iya pamilya kag pila ka katapo sang Office of the Vice President sang indi magnubo sa lima ka na-record nga pagpamahog nga gin-alegar halin sa mga pulis.

Samtang, ginpahayag man ni Castro nga mas madamo nga Pilipino ang may rason nga mahadlok magguwa sang ila mga balay sang tyempo ni ni anay Presidente Rodrigo Duterte bangud mahimo sila mangin biktima sang extrajudicial killings (EJK).

“Mas takot ang mga Pilipino noon na lumabas dahil pag nakursunadahan, malamang ma-EJK ka,” pahayag pa sini sa iya nga video statement.

Gin-gamit man ni Castro ang mga nauna nga pahayag nanday Senator Francis Chiz Escudero, Baguio City Mayor Benjamin Magalong kag anay police colonel Jovie Espenido parte sa crime statistics kag ginapatihan nga mga iregularidad sa pagpatuman sang Oplan Tokhang.#