Ginmandu sang Malacañang ang pag-verify sang gin-report nga quitclaim agreement nga ginpirmahan sang isa ka Aeta farmer sa New Clark City paagi sa iya thumbprint.
Ini kasunod sang mga alegasyon nga may mga indigenous people nga ginapapirma sa mga dokumento nga wala nila nahangpan sang maayo ang kaundan.
Sa video message, ginpahayag ni Palace Press Officer Claire Castro nga ipasiguro ni Bases Conversion and Development Authority (BCDA) President and CEO Ariel Nepomuceno ang pag-authenticate ukon pag-verify sang nasambit nga dokumento.
Ginpahayag ni Castro nga indi dapat magpirma ang isa ka tawo sa dokumento kun wala niya nahangpan ang unod sini.
Suno pa sa iya, indi pagpasugtan ni Presidente Ferdinand Marcos Jr. ang bisan ano nga transaksyon nga makahalit sa mga Pilipino.
Ini nga statement sang Palasyo ang kasunod sang dokumento nga ginsapubliko ni Barnaby Lo, Al Jazeera correspondent nga naga-cover sa Pilipinas kag Asia-Pacific.
Sandig sa amo nga report, ang quitclaim agreement ang ginpirmahan sang isa ka mangunguma nga Aeta sa New Clark City sa Capas, probinsya sang Tarlac, kun sa diin suno sa alegasyon, pila na ka henerasyon sang iya pamilya ang nagapanguma sa amo nga lugar.
Suno kay Lo, halos indi makabasa kag makasulat ang mangunguma gani gin-gamit sini ang iya thumbmark sa baylo nga pirma. Ginpahayag man niya nga wala sing may nagpaathag sa iya kun ano ang mga kondisyon kag unod sang kasugtanan antes niya ini ginbutangan sang thumbmark.
Sa dokumento, nakasulat nga wala nagapanag-iya ang iya pamilya sang duta, nagasuporta siya sa New Clark City project, kag nagbaton sang pinansyal nga bulig nga nagabalor sang P30 per square meter.#














